Söflinger Käppelle erstrahlt in diesem Winter in neuem Glanz
Ein Lob an unseren Neustadtrat Norbert Nolle vom „D´r Bruddler“
Bericht aus dem Söflinger Herbst-Anzeiger 2020
Heut gibt`s tatsächlich amol a Lob vom Bruddler: s´Käppelle erstrahlt in diesem Wenter in neuem Glanz! Mir schreibet zwar erst Oktober, aber „Vorfreude isch die schönste Freude“, ond d`Seflenger kennat sich wieder an ihrem hellerleuchtete Wahrzeiche freue.
Des war fei scho a arge Kugelfuhr. 2018 hot ma g´merkt, dass d`Leitunge nemmer sicher waret. `s wär ja leichtsinnig j´wesa, wenn ma do ei´g´schaltet hätt. In so ma Fall isch immer d`-Feuerwehr tätig worde ond isch mit ma Leiterwage komme, aber des wär jetzt scheint`s z`teuer komme.
No hot a ei´heimischer Handwerker da Auftrag zom Richte kriagt – d´Finanzierung hat ja d`r Handel- ond Gewerbeverei übernomme.
D`r Handwerker hot no 2019 bei d`r Stadt an Pla ei´g´reicht – er braucht ja Platz für da Hubwagen wege d´r Steigleiter. Ond was isch passiert? Abg´lehnt isch´s worde, weil der Wage a Stückle in d`Stroß neig´-stande wär ond d`Autos hättet net dromrom fahre könne, weil do a Verkehrinsele stoht! Ja so ein Bledsinn.
Des hat dem Norbert Nolle, Stadtrat von de Sefelenger Unabhängige Wähler, gewaltig g`schtonka. Nomol a Johr ohne Weihnachts-Käppelle? Noi, auf koin Fall!!!
Er isch no mit ma neue Plänle zur Genehmigongsbehörde gange, ond – schlag me`s Blechle – auf dem Plänle tätet no Verkehrszeiche ond Absprerronge fehle, hot`s g`hoißa! No hot d`r Norbert Nolle g´merkt, dass dia zuständige Dame ieberhaupt koi Ahnong hot, worum `s eigentlich goht. Er hot se no zu ma Ortstermin ei´glade, ond no isch`s auf oimal gange. Im August isch dia Beleuchtung no g´richtet worda.
Ond jetzt freut sich der Norbert Nolle ond mit ihm älle Seflenger auf des beleutete Käppele!
